ДжипСервис+

Экскурсія “Беларуская хатка”

У чацвер 23 студзеня вучні 8 ”В” класа наведалі музейны пакой "Беларуская хатка", які знаходзіцца ў гарадскім доме культуры. Выкарыстоўваючы мясцовы матэрыял, экскурсавод распавяла пра ўклад жыцця нашых продкаў. Слухачы даведаліся пра ўбранне дома, пра правілы і абрады, звязаныя з яго будаўніцтвам, пабачылі і патрымалі ў руках прылады працы, якія ўжо выйшлі з ўжытку.

Напрыканцы экскурсавод прапанавала дзецям замацаваць матэрыял і правяла невялікую віктарыну па расказаным і аб’явіла  самага ўважлівага слухача.


Пласт народнай мудрасці

Славянская народная мудрасць насычана прыкметамі і павер’ямі. Верыць у іх ці не?  На гэта пытанне спрабавалі даць адказ вучні 8 “А” класа ў   чацвер 16 студзеня.

Спачатку рабяты прагледзелі відэапрэзентацыю, а потым пагаварылі пра ўзнікненне і прызначэнне павер’яў, звязаных з домам, надвор’ем, святочнымі прадказаннямі.

Гаворка пра звычаі і павер’і продкаў дала магчымасць кожнаму адчуць, што спадчына беларусаў надзвычай багатая і мудрая.


Жывая даўніна

У чацвер 19 снежня вучні 7 “В” класа разам с класным кіраўніком вырашылі наладзіць экскурсію ў абласны краязнаўчы музей імя Е.Р. Раманава. На гэты раз імі была абрана экспазіцыя “Гісторыя краю ІX- пачатку XX стагоддзяў”. Юныя экскурсанты мелі магчымасць на свае вочы ўбачыць унікальны помнік пісьменства – берасцяную грамату ХІІІ ст., “свяшчэнны” камень “Мядзведзь”, знакамітае паўстанне гараджан-магілёўцаў 1606-1610гг., цудам ацалелыя іконы знішчанага ў 1938 годзе шэдэўра магілёўскай архітэктуры – гарадскога сабора Св. Іосіфа.

Беларускамоўнае сэлфі

Сэлфi з’явілася не так даўно. Але зрабілася моднай з’явай.

Навучэнцам 7 “Б” класа было прапанавана паўдзельнічаць у конкурсе – зрабіць сэлфі і назваць аўтапартрэт па-беларуску. Гэта магчымасць праявіць сябе, конкурс для актыўных, вяселых, для тых, хто любіць родную мову.

12 снежня 2019 года дзеці з цікавасцю паказвалі адзін аднаму свае фотаздымкі, даведваліся беларускія назвы звыклых рэчаў.


Скарбонка мінулага

Вандроўку ў старажытнасць здзейснілі вучні 7 “А” класа, наведаўшы школьны этнаграфічны музей. Пазнаваўчымі аказаліся заданні намінацый “Забытыя рэчы”, “Народныя традыцыі”, “Бабулін куфэрак”, якія расказалі рабятам  пра традыцыйныя святы і абрады беларусаў, пра забытыя побытавыя рэчы нашых продкаў, далі магчымасць узгадаць мінулае. Можна было разгледзець саматканыя абрусы, вышытыя ручнікі, гліняны посуд, саламяныя сурвэткі.



Мы гэтай памяці верныя

Пад такой назвай прайшоў чарговы беларускамоўны чацвер 28 лістапада. Вучні 6 “Е” класа  ўзнавілі ў памяці асноўныя падзеі Вялікай Айчыннай вайны. Удзельнікі мерапрыемства паказалі добрае веданне гісторыі ваенных падзей на тэрыторыі Беларусі, назвалі асноўныя помнікі і мемарыяльныя комплексы, прысвечаныя воінам-вызваліцелям і ахвярам Вялікай Айчыннай вайны. Цэнтрам увагі сталі мастацкія творы, прысвечаныя тэме вайны.

Такія мерапрыемствы можна лічыць урокам мужнасці і прыкладу для вучняў-падлеткаў.


 Зямлі роднай кругавод

21 лістапада вучні 6 "Д” класа разам са сваім класным кіраўніком наведалі музей этнаграфіі  г. Магілёва і прагледзелі экспазіцыю "Зямлі роднай кругавод”. Разнастайныя рэчы хатняга ўжытку, падсобны інвентар, мэбля, адзенне, посуд – усё гэта змаглі пабачыць наведвальнікі музея. Хіба ж  не цікава даведацца, з чаго зроблены  лапці, і ці праўда, што іх абувалі на ногі?

Цікавыя гісторыі  пра старыя рэчы, яркія эмоцыі, незабыўныя ўражанні – падстава наведаць музей яшчэ раз.

Вандроўка па родным краі

14  лістапада  вучні  6”Г”  класа разам з настаўнікам накіраваліся ў вандроўку па родным краі. Падчас мерапрыемства школьнікі ажыццявілі віртуальнае падарожжа па Беларусі. Не выходзячы з класа, усе прысутныя змаглі павандраваць па розных старонках культуры, гісторыі і мовы Беларусі, а заадно і пабачыць, наколькі добра дзеці ведаюць родную краіну. Пытанні і заданні падарожжа датычыліся  самых разнастайных бакоў жыцця Беларусі: яе мовы, літаратуры, этнаграфіі, гісторыі.

 

               

Імёны знаёмыя і незнаёмыя 

Творчасць беларускіх пісьменнікаў - гэта наша спадчына. Мы не павінны забываць імёны тых,  хто ўзбагаціў культуру краіны. 26 кастрычніка споўнілася б 55 гадоў паэту Анатолю Сысу.

Вучні 6 ”В” класа падрыхтавалі невялікую завочную экскурсію “Жыццёвымі і творчымі сцежкамі паэта”.

Падчас гэтага завочнага падарожжа слухачы пазнаёміліся з некаторымі фактамі з біяграфіі паэта, пачулі яго вершы.  Яшчэ ў пачатку творчай дзейнасці паэт выбраў для сябе крэда “Маці — Радзіма — Мова”.

                     

Сем цудаў Беларусі

24 кастрычніка ў адзіны дзень беларускага маўлення вучні 6 “Б” класа “адправіліся” на завочную экскурсію. Удзельнікі віртуальнага падарожжа падрыхтавалі цікавыя звесткі пра знакамітыя мясціны Беларусі. Іх паведамленні суправаджаліся цікавымі фотаздымкамі пра славутасці краіны. У час правядзення мерапрыемства дзеці пабылі ў ролі гідаў і навукоўцаў.

            

Навигация по страницам сайта
Назад | Вперед